Kaafi News

Hareysa(kaafinews):-Danjire James Swan oo ah ergayga uu xoghayaha guud ee Qaramada Midoobay u magacaabay arrimaha Soomaalida iyo wefti uu hoggaaminayo, ayaa la filayaa inuu socdaalkiisii u horeeyay ku yimaado caasimadda Somaliland ee Hargeysa.

Danjire Swan ayaa la filayaa inuu Hargeysa kula kulmo Madaxweynaha JSL Muuse Biixi Cabdi iyo masuuliyiin kale. Tan iyo markii laba bilood ka hor la magacaabay ergaygan waa socdaalkii u horeeyay ee uu ku yimaado Somaliland.

Diblomaasigan Maraykanka ah ayaa ka hor xilkan Qaramada Midoobay wuxuu ahaa safiirka Maraykanka u qaabilsan Soomaalida, waxaanu wakhtigaas ahaa sarkaal xogogaal u ah arrimaha Somaliland iyo Soomaaliya, isagoo dhawr goor la kulmay Madaxweynihii hore ee Somaliland Axmed Siilaanyo.

Wargeyska Geeska Afrika ayaa dib ugu noqday kaydka uu ka hayo ergaygan socdaalka ku imanaya Hargeysa oo hore si waafi ah uga hadlay qaddiyadda Somaliland, wada hadalada Somaliland iyo Soomaaliya iyo amuuro kale oo gobalka ku saabsan.

September 2012

Bishii September ee sannadkii 2012, wuxuu danjire James Swan ka hadlay wada hadaladii Somaliland iyo Soomaaliya,

Danjire James Swan, oo markaas ahaa safiirka dalka Maraykanka u qaabilsana Somaliland iyo Somaliya ayaa shirjaraa’id oo ku qabtay magaalada Nayrobi ee dalka Kenya, wuxuu ku sheegay in wejigii hore ee wada hadalka Somaliland iyo Soomaaliya lagu qorsheeyay sidii uu wada xaajood wax ku ool ahi u dhici lahaa mustaqbalka. Isagoo ka jawaabayay su’aal la weydiiyay oo la xidhiidhay hadal uu Madaxweynihii hore ee Soomaaliya Xasan Sheekh Maxamuud oo markaas la doortay uu ku balan qaaday inuu sii wadayo wada hadalada Somaliland iyo Soomaaliya, wuxuu yidhi safiirku “Wada hadaladii u dhexeeyey Somaliland iyo xukuumada Muqdisho ee Ingiriiska iyo Norway fududeeyeen, ayaa muhiimadii ugu horeysay ee wada hadaladaasi noqdeen kuwo lagu qorsheeyo sida mustaqbalka wada xaajood wax ku ool ahi u dhici lahaa. Sidoo kale, waxaan filaynaa in qorshahaasi sii socon doono, iyagoo ku dhisan sidii bilowgii ay ku heshiiyeen, kuna bilaabi doonaan inay qorshe dhigtaan, oo bilowga la cadeyn doono qodobada wada xaajoodka mustaqbalka lagu soo qaadan doono. Laakiin, taasi waxay u muuqataa mid ku soo kordhaysa hawlahii labada dhinac oo xilligan bilaabaya inay qeexaan shuruudaha wada xaajoodkaa.”

March 2013

Bishii March ee sannadkii 2013, wuxuu danjire James Swan, waraysi uu siiyay koox lagu magacaabi jiray USDOTSomali, oo ka tirsanayd wasaaradda arrimaha dibadda ee Maraykanka, waxaanu waraysigaas ku sheegay in Maraykanku la dhacsanyahay horumarka ay Somaliland ka samaysay dhinacyada ammaanka, kobaca dhaqaalaha iyo dimuqraadiydada, “Dawlada Maraykanka iyo saaxiibadeeda caalamkuba waxay qadarin iyo ixtiraam weyn u hayaan dedaalka ay sameeyeen dadka reer Somaliland sanadihii la soo dhaafay iyaga oo si heersare ah u ilaaliyay nabadgalyada iyo xasiloonida dhulka Somaliland, iyo dhinaca dawlada oo qabatay dhawr doorashooyin oo aad u heer sareeyay, waxa kale oo bogaadin iska leh shacabka dedaalkooda ay ku doonayaan inay ku hagaajiyaan dhaqaalaha iyo arimaha nolasha.”

Wuxuu diblomaasigan Maraykanka ahi intaas raaciyay ” Sidaas daraadeed dawlada Maraykanku waxay rabtaa inay sii wado inay kala shaqayso dadka Somaliland iyo maamulka dhinacyada gargaarka bini’aadanimo, dib u dhiska iyo horumarinta iyo dhinacyada xidhiidhka dawladnimo ee aanu wadaagno, isla markaasna mawqifka dawlada Maraykanku waa mid barbar socda la’na mawqif ah qaramada midoobay, midawga Afrika iyo dawladaha la jaarka ah Somaliya.”

Dawlada Soomaaliya Oo Guddi U Magacawday Baadhitaanka Qaraxii Ka Dhacay Xarunta Gobolka Banaadir

Qaraxi galabta ka dhacay magaalada Muqdisho ayaa la sheegay iney ku dhinteen 6 qof oo ay laba guddoomiye degmo ka mid yihiin.

Wasiirka Warfaafinta, Dhaqanka iyo Dalxiiska Soomaaliya Maxamed Cabdi Xayir Maareeye oo BBC u warramay ayaa sheegay in qaraxi galabta ka dhacay xaruunta dowladda hoose ee Muqdisho ay ku dhinteen 6 ruux, oo ay laba ka mid ah yihiin guddoomiyeyaal degmo, agaasimayaal iyo mas’uuliyiin kale oo maamulka gobolka banaadir ka tirsan ay ka mid

Wuxuu sida oo kale sheegay qaraxaasi iney ku dhaawacmeen 6 qof oo kale oo uu ka mid yahay Guddoomiyaha gobolka banaadir ahna duqa magaalada Muqdisho.

Wasiir Maareeye oo ka hadlayey xaaladda uu ku sugan yahay Guddoomiyaha Gobolka banaadir Injineer C/raxmaan Yariisow wuxuu sheegay sida ay dhakhtarrada ay u sheegeen isaguna uu soo arkay inuu dhaawaciisa uusan halis ahayn.

“Dadka uu qaraxaasi dhaawaca uu ka soo gaaray waxaa lagu dabiibayaa Isbitaalka Digfer oo dhaawacyada ugu badan la geeyey dhaawacyada sida ay kala yihiinna warbixinta ugu dambeyso waxaan ka sugeynaa dhakhaatiirta.” ayuu yiri.

Sidoo kale Wasiir Maareeye waxa uu sheegay in Hay’adaha Ammaanka ay wadaan baaritaan ku aadan falkii argigixisanimo islamarkaana ay faah faahin dheeri ah dib ka soo sheegi doonaan.

“Dowlad ahaanna waan cambaareyneynaa ficilka aragaggixisada ee bahalnimada ah waa sida uu hadalka u dhigaye, oo lagu soo qaaday mas’uuliyiinta soomaaliyeed ee ka shaqeeynayey sidi uu dalkan uu nabad u heli lahaa dadka soomaaliyeedan ay horumar iyo noola u heli lahaa.”

“Shacabka Soomaaliyeedna waxaan u sheegeynaa wax cad weeye inaan dagaal kula jirno waxa uu ugu yeeray argagixisada caalamiga ah iyo kuwa gudaha ee la duufsaday dagaal kula jirno, shacabka Soomaaliyeedna waxaan leennahay dagaalkaasi lagu hayo argagixisada iney ku gacan siiyaan dowladda” ayuu yiri Wasiirka Warfaafinta, Dhaqanka iyo Dalxiiska Soomaaliya Maxamed Cabdi Xayir Maareeye oo BBC u warramay.

Weerarka Ismidaaminta galabta ka dhacay xaruunta dowladda hoose ee Muqdisho waxaa sheegtay ururka Al-shabaab.

Qaraxa ayaa ka dhacay xaruunta dowladda hoose ee magaalada Muqdisho xilli uu maamulka Gobolka Banaadir uu halkaasi uga socday shir toddobaadla ah oo ay yeeshaan.

Xaruunta gobolka Banaadir waxay ka mid tahay xaruumaha dowladda ee sida weyn ammaankooda loo adkeeyo.

Guddoomiyaha gobolka banaadir ahna duqa magaalada Muqdisho Injineer C/raxmaan Yariisoow ayaa

la sheegay inuu dhaawac uu ka soo gaaray qarixi ka dhacay xaruunta dowladda hoose ee Muqdisho.

Warkan oo aan ka soo xigannay Radio Muqdisho ayaa sheegaya guddoomiye ku xigeenka Koobaad ee maamulka gobolka Benadir Mudane Tuuleh oo la hadlay Radio Muqdisho inuu shacabka gobolka Benadir uu ugu baaqay iney is dajiyaan.

Qaraxa ayaa ka dhacay xaruunta dowladda hoose ee magaalada Muqdisho ayaa dhacay xilli uu maamulka uga socday shir toddobaadla ah oo ay yeeshaan.

Qof ku sugnaa gudaha hoolka uu shirka ka socday oo BBC u warramay ayaa sheegay inuu maqlay jug culus oo gudaha hoolka ka dhacday, dabadeedna uu arkay dad fara badan oo dhaawa ah oo goobtaasi laga qaadayo sida oo kalana ay jiraan dad dhintay.

Dadki ku dhaawacmay qaraxaasina waxaa la geeyey isbitaalka Digfer oo hadda loo yaqaanno Erdogan.

Xaruunta gobolka Banaadir oo ah xaruun ammaankeeda si weyn loo adkeeyo ayaan weli la garan qasaaraha rasmiga ee qaraxaasi ka dhashay.

Haddaba wixi ka soo kordho qasaaraha qaraxaasi BBC-da waxay la wadaagi doontaa akhristayaasha iyo dhageystayaasheeda.

BBC.